कबीर मन्शूर (स्वसंवेदार्थ प्रकाश)

ज्ञानीवचन शेषनागसे ।

पुरुष भेद कोउ जानत नाहीं । लागे सभे कालकी छाहीं ॥
राखनहार कहैं चीन्हहु भाई । जम सोको तुहिं लेइ छुडार्ई ॥

शेषनाग वचन ।

ब्रह्मा विस्नु रुद्र जिहि ध्यावैं । वेद जासुगुन निसि दिन गावैं ॥
सोइ पुरुष मंहि राखनहारा । कहाकरिहै जमराज बिचारा ॥

ज्ञानीवचन ।

जाहि कहहु तुम राखन हारा । सो तुमहिं लै करिहि अहारा ॥
राखनिहार और कोउ आही । करु विश्वास मिलाऊं ताही ॥

कबीरवचन धरमदास प्रति ।

सेष खानि विष तेज सुभाऊ । वचन प्रतीत हृदय नहिं आऊ ॥
सुनहु सुलच्छन धरमति नागर । तब मैं आयउँ या भवसागर ॥
आये जब मृत्यु मंडल माहीं । पुरुष अंक कहूँ देख्यो नाहीं ॥
कासो कहूँ पुरुष उपदेसा । सो तो अधिक अहै जम भेसा ॥
जो घातक ताको विस्वासा । जो रच्छक तेहि बोल उदासा ॥
जाको जपहिं सो धरि खाई । तब अस भाव चेत चित आई ॥
जीव मोह वस चीन्हत नाहीं । तब असभाव बरते हियमाहीं ॥

छन्द—अबहीं मेटि डारीं कालको, प्रगट कला दिखावऊँ ।

लेऊँ जीवन छोरि जमसों, अमर लोक पठावऊँ ॥

जाहि कारनमें रटत डोलों, सो न मोकहैं चीन्हई ।

कालके बस परे ये जिव सब, तजि सुधा विष लीन्हई ॥

सोरठा—पुरुष वचन अस नाहिं, यह सोच चित्त कीन्हैऊ ।

ले पहुँचावहु ताहि, शब्द परख दिढके गहे ॥

पुनि जस चरित भयो धरमदासा । सो सब वरनि कहों तुव पासा ॥

ब्रह्मादिके ध्यान द्वारा रामनामका प्राकट्य ।

ब्रह्मा विस्नु सम्भु सनकादी । सब मिलि कीन्ही सून्य समाधी ॥

कौन नाम सुमिरों करतारा । कवनहिं नाम ध्यान अनुसार ॥

सबहिं सून्य महीं ध्यान लगाये । स्वाति सनेह सीप ज्यों लाये ॥

तबहिं निरंजन जतन विचारा । सून्य गुफा ते शब्द उचारा ॥

रर्रा सब्द उठा बहु बारा । मा अच्छर माया संसारा ॥

दोउ अच्छर कहैं सम कै राखा । राम नाम सबहिंन अभिलाखा ॥