श्रीमद्भागवत महापुराण

अथ पञ्चदशोऽध्यायः

राजा बलिकी स्वर्गपर विजय

राजोवाच

बलेः पदत्रयं भूमेः कस्माद्धरिरयाचत ।
भूत्वेश्वरः कृपणवल्लब्धार्थोऽपि बबन्ध तम् ।।१
एतद् वेदितुमिच्छामो महत् कौतूहलं हि नः ।
यज्ञेश्वरस्य पूर्णस्य बन्धनं चाप्यनागसः ।।२

श्रीशुक उवाच

पराजितश्रीरसुभिश्च हापितो
  हीन्द्रेण राजन्भृगुभिः स जीवितः ।
सर्वात्मना तानभजद् भृगून्बलिः
  शिष्यो महात्माथर्निवेदनेन ।।३

तं ब्राह्मणा भृगवः प्रीयमाणा
  अयाजयन्विश्वजिता त्रिणाकम् ।
जिगीषमाणं विधिनाभिषिच्य
  महाभिषेकेण महानुभावाः ।।४

ततो रथः काञ्चनपट्टनद्धो
  हयाश्च हर्यश्वतुरङ्गवर्णाः ।
ध्वजश्च सिंहेन विराजमानो
  हुताशनादास हविर्भिरिष्टात् ।।५

धनुश्च दिव्यं पुरटोपनद्धं
  तूणावरिक्तौ कवचं च दिव्यम् ।
पितामहस्तस्य ददौ च माला-
  म्म्लानपुष्पां जलजं च शुक्रः ।।६

एवं स विप्रार्जितयोधनार्थ-
  स्तैः कल्पितस्वस्त्ययनोऽथ विप्रान् ।
प्रदक्षिणीकृत्य कृतप्रणामः
  प्रह्लादमामन्त्र्य नमश्चकार ।।७