तैत्तिरीय ब्राह्मण (कृष्ण यजुर्वेद - सायणभाष्य सहित भाग १)

तैत्तिरीयब्राह्मणम् (१.८.६) उ॒च्छे॒षण॑स्य पा॒ता । यदि॑ ब्रा॒ह्म॒णं न वि॒न्देत् । व॒ल्मी॒क॒व॒पाया॑मव॑नयेत् । सैव ततः॑ प्राय॑श्चित्तिः । यद्वै सौत्रा॒म॒ण्यै व्यृ॑द्धम् । तद॑स्यै॒ समृ॑द्धम् । ना॒ना॒दे॒व॒त्याः॑ प॒शव॑श्च पुरो॒डाशा॑श्च भवन्ति॒ समृ॑द्ध्यै । ऐन्द्रः॑ प॑शू॒नामु॑त्त॒मो भ॑वति । ऐन्द्रः॑ पुरो॒डाशा॑नां प्रथ॒मः (२) । इ॒न्द्रिये ए॒वास्मै॑ स॒मीची॑ दधाति । पु॒रस्ता॑दनूया॒जानां॑ पुरो॒डाशैः॑ प्रचरति । प॒शवो॒ वै पुरो॒डाशाः॑ । प॒शूने॒वाव॑रुन्धे । ऐ॒न्द्रमेका॑दशकपालं॒ निर्व॑पति । इ॒न्द्रि॒यमे॒वाव॑रुन्धे । सा॒वि॒त्रं द्वाद॑शकपालं प्र॒सूत्यै॑ । वारु॒णं दश॑कपालम् । अन्त॑त ए॒व वरु॑णमव॑जयते । वड॑वा दक्षि॑णा (३) । उ॒त वा ए॒षाऽश्वं 'सूते । उ॒ताश्व॑तरम् । उ॒त सोम॑ उ॒त सुरा॑ । यत्सौ॑त्रा॒मणीसमृ॑द्ध्यै । बार्ह॑स्प॒त्यं प॒शुं चतु॒र्थम॑तिप॒वित्स्याऽल॑भते । ब्रह्म॑ वै दे॒वानां॒ बृह॒स्पतिः॑ । ब्रह्म॑णैव य॒ज्ञस्य॒ व्यृ॑द्धमपि॑वपति । पुरो॒डाश॑वाने॒ष प॒शुर्भव॑ति । न ह्यै॒तस्य॒ ग्रहं॑ गृह्णन्ति॑ । सोम॑प्रतीकाः । पि॒तर॑स्तृप्णु॒तेति॑ शता॒तृष्णाया॑ 'स॒मव॑नयति (४) । श॒तायुः॑ पुरु॑षः श॒तेन्द्रि॑यः । आ॒युष्ये॒वेन्द्रि॑ये प्रति॑तिष्ठति । दक्षि॑णे॒ऽग्नौ जु॑होति । पा॒प॒वस्य॒सस्य॒ व्यावृ॑त्त्यै । हिर॑ण्यमन्त॒रा धार॑यति । पू॒तामे॒वैनां॑ जुहोति । श॒तमा॑नं भ॑वति । श॒तायुः॑ पुरु॑षः श॒तेन्द्रि॑यः । आ॒युष्ये॒वेन्द्रि॑ये प्रति॑तिष्ठति । यत्रै॒व श॑ता॒तृष्णां धार॑यति (५) । तन्निद॑धाति॒ प्रति॑ष्ठित्यै । पि॒तृन्वा ए॒तस्यैन्द्रि॑यं वी॒र्यं॑ ग॑च्छति । य ॅसोमो॑ऽति॒पव॑ते । पि॒तॄणां या॑ज्यानुवा॒क्या॑भि रुप॑तिष्ठते । यदे॒वास्य॑ पि॒तॄनिन्द्रि॑यं वी॒र्यं॑'गच्छ॑ति । तदे॒वाव॑ रुन्धे । ति॒सृभि॒रुप॑तिष्ठते । तृ॒तीये॒ वा इ॒तो लो॒के पि॒तरः॑ । ताने॒व प्री॑णाति । अथो॒ त्रीणि॒ वै य॒ज्ञस्यैन्द्रि॒याणि॑ ।