वायु पुराण

[अ० ६३-६४ श्लो० ५५-५६-१-१७] वायुपुराणम्। २३९ (वैवस्वतसर्गवर्णनम्) अनन्ता नातिरिक्ताश्च सर्वे सर्गा विवस्वतः। आरोग्यायुः प्रमाणेन धर्मतः कामतोऽर्थतः ॥ एतानेव गुणानेति यः पठत्यनसूयकः ॥ ५५ वैवस्वतस्य वक्ष्यामि सांप्रतस्य महात्मनः। समासाद्व्यासतः सर्गे ब्रुवतो मे निबोधत ॥ ५६ इति महापुराणे वायुप्रोक्ते पृथुवंशानुकर्त्तनं नाम त्रिषष्टितमोऽध्यायः॥ ६३ ॥ आदितः श्लोकानां समष्टयङ्काः--५३३५

अथ चतुःषष्टितमोऽध्यायः। वैवस्वतसर्गवर्णनम्।

सूत उवाच-- सप्तमे त्वथ पर्याये मनोर्वैवस्वतस्य ह। मारीचात्कश्यपाद्देवा जज्ञिरे परमर्षयः॥ १ आदित्या वसवो रुद्राः साध्या विश्वे मरुद्गणाः। भृगवोऽङ्गिरसश्चैव सृष्टौ देवगणाः स्मृताः॥ २ आदित्या मरुतो रुद्रा विज्ञेयाः कश्यपात्मजाः। साध्याश्च वसवो विश्वे धर्मपुत्रास्त्रयो गणाः॥ ३ भृगोस्तु भार्गवो देवो ह्यङ्गिरोऽङ्गिरसः सुतः। वैवस्वतेऽन्तरे ह्यस्मिन्नित्यं ते छन्दजाः सुराः॥ *एतेऽपि च गमिष्यन्ति महतः कालपर्ययात्॥ ४ एष मार्गस्तु मारीचो विज्ञेयः सांप्रतः शुभः। तेजस्वी सांप्रतस्तेषामिन्द्रो नाम्ना महाबलः॥ ५ अतीतानागता ये च वर्तन्ते ये च सांप्रतम्। सर्वे मन्वन्तरेन्द्रास्तु विज्ञेयास्तुल्यलक्षणाः॥ ६ भूतभव्यभवन्नाथाः सहस्राक्षाः पुरंदराः। मघवन्तश्च ते सर्वे शृङ्गिणो वज्रपाणयः॥ सर्वैः ऋतुशतेनेष्टं पृथक्शतगुणेन तु॥ ७ त्रैलोक्ये यानि सत्त्वानि गतिमन्त्यबलानि च। अभिभूयावतिष्ठन्ते धर्माद्यैः कारणैरपि॥ ८ तेजसा तपसा बुद्ध्या बलश्रुतपराक्रमैः। भूतभव्यभवन्नाथा यथा ते प्रभविष्णवः॥ एतत्सर्वं प्रवक्ष्यामि ब्रुवतो मे निबोधत॥ ९ भूतं भव्यं भविष्यं तत्स्मृतं लोकत्रयं द्विजैः। भूर्लोकोऽयं स्मृतो भूमिरन्तरिक्षं भुवं स्मृतम्॥ भव्यं स्मृतं दिवं ह्येतत्तेषां वक्ष्यामि साधनम्॥ १० ध्यायता पुत्रकामेण ब्रह्मणाऽग्रे विभावितम्। भूरिति व्याहृतं पूर्वं भूर्लोकोऽयमभूतदा॥ ११ भूसत्तायां स्मृतो धातुस्तथाऽसौ लोकदर्शने। भूतत्वाददर्शनत्वाच्च भूर्लोकोऽयमभूत्ततः॥ अतोऽयं प्रथमो लोको भूतत्वाद्व्र्द्विजैः स्मृतः॥ १२ भूतेऽस्मिन्भवदित्युक्तं द्वितीयं ब्रह्मणा पुनः। भवत्युत्पद्यमानेन कालशब्दोऽयमुच्यते॥ १३ भवनात्तु भुवर्लोको निरुक्तैर्निरुच्यते। अन्तरिक्षं भुवस्तस्माद्वितीयो लोक उच्यते॥ १४ उत्पन्ने तु भुवर्लोके तृतीयं ब्रह्मणा पुनः। भव्येति व्याहृतं यस्माद्भव्यो लोकस्तदाऽभवत्॥ १५ अनागते भव्य इति शब्द एष विभाव्यते। तस्माद्भव्यो ह्यसौ लोको नामतस्तु दिवं स्मृतम्॥ १६ स्वरित्युक्तं तृतीयोऽन्यो भाव्यो लोकस्तदाऽभवत्। भाव्य इत्येष धातुर्वै भाव्ये काले विभाव्यते॥ १७

---

* इदमर्धं नास्ति क. पुस्तके।