गदनिग्रह (आचार्य सोढल - कायचिकित्सा एवं रोग-विनिश्चय सटीक)

गदनिग्रहः । ६५ कुष्ठे जीवन्त्याद्यं तैलम् । जीवन्ती मञ्जिष्ठा दार्वी कम्पिल्लकः पयस्तुत्थम् । एष घृततैलपाकः सिद्धः सर्जरससंयुक्तः ॥ ३८७ ॥ देयः समधुच्छिष्टो विपादिका तेन शाम्यतेऽभ्यक्ता । चर्मैककुष्ठं किटिभं सिध्मं शाम्यत्यलसकं च ॥ ३८८ ॥ पामायां जीरकाद्यं तैलम् । जीरकस्य पलं पिष्टं सिन्दूरार्धपलं तथा । कटुतैलं पचेदेभिः सद्यः पामाहरं परम् ॥ ३८९ ॥ कृमिरोगे विडङ्गाद्यं तैलम् । विडङ्गानि स्नुहीक्षीरमर्कक्षीरं तथैव च । गुञ्जाफलानि गण्डीरं श्यामा निर्दहनी तथा ॥३९०॥ एतैर्गोमूत्रसंपिष्टैस्तैलं मूर्ध्नि निधापयेत् । कृमयः पूरणादेव नश्यन्त्यपि विमार्गगाः ॥ ३९१ ॥ वातरोगे गडूचीतैलम् । तुलां पचेज्जलद्रोणे गडूच्याः पादशेषितम् । क्षीरद्रोणयुतं कल्कैः पचेत्तैलाढकं शनैः ॥ ३९२ ॥ पिष्टैर्मधुकमञ्जिष्ठाजीवनीयैर्युतं तथा । कुष्ठैलागुरुमृद्वीकामांसीव्याघ्रीनखैर्नखैः ॥ ३९३ ॥ हरेणुश्रावणीव्योषशताह्वाशृङ्गिसारिवैः । त्वक्पत्रागुरुविक्रान्तास्थिरातामलकीघनैः ॥ ३९४ ॥ नतकेसरह्रीवेरपद्मकोत्पलचन्दनैः । सिद्धं तच्छनकैस्तैलं पानाभ्यञ्जनबस्तिषु ॥ ३९५ ॥ धन्यं पुंसवनं स्त्रीणां गर्भदं वातपित्तनुत् । तोदकम्परुजायामशिरःकम्पामयार्दितान् ॥ ३९६ ॥ हन्याद्रुणकृतान्दोषान् गडूचीतैलमुत्तमम् । वातरोगे द्वितीयं गडूचीतैलम् । अमृतायास्तुलाः पञ्च द्रोणेष्वष्टास्वपां पचेत् ॥३९७॥