गान्धर्व तन्त्र (शैव-शाक्त आगम - मन्त्र-रहस्य, यन्त्र एवं देवतोपासना सटीक)

चतुरस्रे समे शुद्धे मध्योच्छ्लूनविभूषिते । युग्माङ्गामिलितं देवि पट्टस्येह समीरितम् ॥ १० ॥ अथवा परमेशानि भूमौ चक्रं समालिखेत् । हस्तमात्रमिते शुद्धे गोमयेनोपलेपिते ॥ ११ ॥ सिन्दूररजसा तत्र कुङ्कुमेनाथ वा प्रिये । आलेखेच्चक्रराजं च लेखन्या हैमया तथा ॥ १२ ॥ अथवा कुशमूलेन दर्भपाणिः समाहितः । नेत्ररम्यं यथा चक्रं तथा कुर्याद्विचक्षणः ॥ १३ ॥ प्रतीच्यग्रं लिखेदेकं त्रिकोणं तदुपर्यथ * । पूर्वत्रिकोणमध्याग्रं त्रिकोणान्तरमालिखेत् ॥ १४ ॥ अथ संधिद्वय भित्त्वा प्रागग्रं विलिखेत् परम् । त्रिकोणमध्यगं चक्रमष्टकोणं तथा भवेत् ॥ १५ ॥ ततो दशारचक्रस्य निर्माणं शृणु पार्वति । दक्षिणोत्तरगा रेखास्तिस्रो यास्तत्र तास्वपि ॥ १६ ॥ मध्यरेखां परित्यज्य रेखे द्वे परिवर्धयेत् । तेन षट्कोणकं कृत्वा संधिभेदे चतुष्टयम् ॥ १७ ॥ कृत्वी रेखाद्वयं कुर्याद् दशकोणं यथा भवेत् । तथान्यदशकोणस्य निर्माणं परिकीर्त्यते ॥ १८ ॥ दक्षिणोत्तरगास्त्वेवं रेखाः पञ्च भवन्ति याः । तासां रेखा(द्व?त्र)यं मध्ये हित्वा पूर्वापरं तु तत् ॥ १९ ॥ बाह्यरेखाद्वयं देवि पूर्ववत् परिवर्धयेत् । 'लि' क पाठ. । द्वे क पाठ ।