गान्धर्व तन्त्र (शैव-शाक्त आगम - मन्त्र-रहस्य, यन्त्र एवं देवतोपासना सटीक)

ऊनचत्वारिंशः पटलः । -=-:❀:=- जगन्मय्युवाच मा विषीद महादेव सर्वथा त्वं स्थिरो भव । कुलज्ञानी कथं त्वं हि भावज्ञानी कथं पुनः ॥ १ ॥ इत्येवं त्वं मया पृष्टस्त्वमात्मानं न विस्मर । तदानन्दमयं धाम स्वविद्याभेदसंगतम् ॥ २ ॥ पुरुषः प्रकृतिश्चैव नित्यौ द्वौ समुपस्थितौ । सगुणाधिबला देवी निर्गुणो निर्बलः पुमान् ॥ ३ ॥ अविद्यानाद्यरूपा सा मदंशा भेदरूपिणी । सिसृक्ष्यापि नीचास्य सविधे समुपास्थिता ॥ ४ ॥ सिसृक्षया मया पूर्वं प्रार्थितः पुरुषः खलु । मामानन्दय सानन्दमित्युक्त्वा धर्षितः प्रभुः ॥ ५ ॥ मया धर्षितमात्रोऽसौ बभूव सगुणो विभुः । तत्तदानन्दसंदोहै(रा?: सा)नन्दाहं पुनः पुनः ॥ ६ ॥ जडत्वादुभयोर्देव शून्यभावमुपागतम् । अथानन्दात्मनोजाता शक्तिराद्या सनातनी ॥ ७ ॥