मानमेयोदय (नारायण भट्ट - भाट्ट मीमांसा प्रमाण एवं प्रमेय शास्त्र सटीक)

3 देवतोद्देशतो द्रव्यत्यागो यागो निरुच्यते । दानं स्वस्वत्वमुन्मृद्य परस्वत्वप्रकल्पनम् ॥ प्रक्षेपसहितो यागो होम इत्यभिधीयते । यथेष्टविनियोगस्य योग्यत्वं स्वत्वमुच्यते ॥ देवतातत्वं त्यज्यमानद्रव्योद्देश्यत्वमिष्यते । अथवा विधिवाक्यस्थशब्दत्वसमवृत्तिमान् ॥ अखण्डोपाधिरथवा तच्छब्दप्रतिपाद्यता । प्रतिग्रहीतृत्वयोगे सैव स्यात्सम्प्रदानता ॥ अव्यक्तिरुत्पत्तिवाक्ये देवतानभिबोधनम् । तथाऽवदीयमानत्वं हविष्टुमिति भाष्यते ॥ 4 क्रत्वनुष्ठाप्यता यत्र क्रत्वर्थत्वं तदुच्यते । फलानुष्ठाप्यता यत्र सोच्यते पुरुषार्थता ॥ फलस्य पुरुषार्थत्वव्यवहारस्तु भक्तितः । विधानमप्रवृत्तस्य प्रवर्तनमितीरितम् ॥ उपादानमनुष्ठानमननुष्ठितगोचरम् । अनुष्ठानोद्देश्यतया विहितं स्यात्प्रयोजकम् ॥ विधेयत्वेन विहितं प्रयोज्यमिति निर्णयः । प्रधानमिह विध्यादिरङ्गं विध्यन्त उच्यते ॥ दक्षिणा नाम तद्द्रव्यं यत्स्यादानतिसाधनम् । सा चैकस्मिन् क्रतावेका वशीकरणमानतिः ॥