मानमेयोदय (नारायण भट्ट - भाट्ट मीमांसा प्रमाण एवं प्रमेय शास्त्र सटीक)

70 मानमेयरहस्यश्लोकवार्तिके पाञ्चरात्रश्रुतिः पाञ्चरात्रोपनिषदोऽपि च । संकर्षणस्य सूत्राणीत्यादिकं विविधं तु तत् ॥ तत्सूत्रस्थं वाक्यमेकमिदं तावदुदाहृतम् । येनेदं दृश्यते विश्वं द्रष्टा सर्वस्य यस्सदा ॥ दृश्यश्चराचरत्वे यः स विष्णुरिति गीयते । एतेन विष्णुपारम्यसिद्धान्तोऽयमिति स्थितम् ॥ तत्सूत्रमनुसृत्यैव काशकृत्स्नेन वाऽथवा । कृतं जैमिनिना सूत्रं देवताकाण्ड इष्यते ॥ पूर्णप्रज्ञैरनुव्याख्याप्रबन्धे देवकाण्डगः । द्वितीयलक्षणश्शेषप्रणीत इति भाषितम् ॥ स एष संकर्षकाण्डः मीमांसाभाष्यकर्तृभिः । आचार्यशबरैः पूर्वाचार्यैश्च समुदाहृतः ॥ अन्ते हरौ स विष्णुश्च तं ब्रह्मेति च सूत्रणात् अथातो ब्रह्मजिज्ञासा चेति शास्त्रं सुसङ्गतम् १ तत्र शारीरकं शास्त्रं बादरायणनिर्मितम् । स बादरायणो व्यास इत्याहुर्बहवो बुधाः ॥ श्रीमद्रामानुजाचार्यः बादरायणनिस्वनम् । भाष्ये स्वे सूत्रकृत्त्वेन व्यासत्वेनाप्यभाषत ॥ तथा श्रीयामुनाचार्यस्सिद्धित्रयनिबन्धने । उपक्रमे प्राह सूत्रं बादरायणनिर्मितम् ॥