ऋभु गीता (शिव रहस्य - निदिध्यासन व अद्वैत बोध)

सर्वं ब्रह्मैव नास्त्यन्यत् सर्वं ज्ञानमयं तपः । स्वयमेव हि नास्त्येव सर्वातीतस्वरूपवान् ॥ १९.४४॥

वाचातीतस्वरूपोऽहं वाचा जप्यमनर्थकं । मानसः परमार्थोऽयं एतद्वेदमहं न मे ॥ १९.४५॥

कुणपं सर्वभूतादि कुणपं सर्वसंग्रहं । असत्यं सर्वदा लोकमसत्यं सकलं जगत् ॥ १९.४६॥

असत्यमन्यदस्तित्वमसत्यं नास्ति भाषणं । असत्याकारमस्तित्वं ब्रह्ममात्रं सदा स्वयं ॥ १९.४७॥

असत्यं वेदवेदांगं असत्यं शास्त्रनिश्चयः । असत्यं श्रवणं ह्येतदसत्यं मननं च तत् ॥ १९.४८॥

असत्यं च निदिध्यासः सजातीयमसत्यकं । विजातीयमसत् प्रोक्तं सत्यं सत्यं न संशयः । सर्वं ब्रह्म सदा ब्रह्म एकं ब्रह्म चिदव्ययं ॥ १९.४९॥

चेतोविलासजनितं किल विश्वमेत- द्विश्वाधिकस्य कृपया परिपूर्णभास्वात् । नास्त्यन्यतः श्रुतिशिरोत्थितवाक्यमोघ- श्शास्त्रानुसारकरणैर्भवते विमुक्त्यै ॥ १९.५०॥

॥ इति श्रीशिवरहस्ये शंकराख्ये षष्ठांशे ऋभुनिदाघसंवादे ब्रह्मानंदप्रकरणं नाम एकोनविंशोऽध्यायः ॥