तैत्तिरीय ब्राह्मण (कृष्ण यजुर्वेद - सायणभाष्य सहित भाग १)

वि॒राजै॒वान्नाद्य॒मव॑रुन्धे । यज॑मानो॒ वा एक॑कपालः । तेज॒ आज्य॑म् । यदेक॑कपा॒ल॒ आज्य॑मानय॑ति । यज॑मानमे॒व तेज॑सा॒ समर्ध॑यति । यज॑मानो॒ वा एक॑कपालः । प॒शव॒ आज्य॑म् (४) । यदेक॑कपा॒ल॒ आज्य॑मानय॑ति । यज॑मानमे॒व प॒शुभिः॒ समर्ध॑यति । यदल्प॑मान॒येत् । अल्पा॑ एनं प॒शवो॑ भु॒ञ्जन्त॒ उप॑तिष्ठेरन् । यद्ब॒ह्वाना॒येत् । ब॒ह्व॑ एनं प॒शवो भु॒ञ्जन्त॒ उप॑तिष्ठेरन् । ब॒ह्नानीयाऽऽविः पृ॒ष्ठं कु॑र्यात् । ब॒ह्व॑ ए॒वैनं॑ प॒शवो॑ भु॒ञ्जन्त॒ उप॑तिष्ठन्ते । यज॑मानो॒ वा एक॑कपालः । यदेक॑कपालस्याव॒द्येत् । (५) । यज॑मानस्याव॒द्येत् । उद्वा माद्ये॒द्यज॑मानः । प्र वा॑ मीयेत । स॒कृदे॒व होत॑व्यः । स॒कृदि॑व॒ हि सु॑व॒र्गो लो॒कः । हु॒त्वाऽभिजु॑होति । यज॑मानमे॒व सु॑व॒र्गं लो॒कं ग॑मयित्वा । तेज॑सा॒ समर्ध॑यति । यज॑मानो॒ वा एक॑कपालः । सु॒व॒र्गो लो॒क आ॑हव॒नीयः (६) यदेक॑कपालमाहव॒नीये॑ जु॒होति॑ । यज॑मानमे॒व सु॑व॒र्गं लो॒कं ग॑मयति । यद्धस्ते॑न जुहु॒यात् । सु॒व॒र्गाल्लो॒का द्यज॑मान॒मर्व॑विध्येत् । स्रुचा जु॑होति । सु॒व॒र्गस्य॑ लो॒कस्य॒ समर्ष्ट्यै॑ । यत्प्राङ्पद्ये॑त । दे॒व॒लो॒कम॑भिजयेत् । यद्दक्षिणा पि॑तृलो॒कम् । यत्प्रत्यक् (७) । रक्षा ँ 'सि य॒ज्ञ ँ ह॑न्युः । यदुदङ् । म॒नु॒ष्य॒लो॒कम॑भिजयेत् । प्रति॑ष्ठितो होत॒व्यः॑ । एक॑कपालं॒ वै प्रति॑तिष्ठन्तं॒ द्यावा॑पृथि॒वी अनुप्रति॑तिष्ठतः । द्यावा॑पृथि॒वी ऋ॒तवः॑ । ऋ॒तून्य॒ज्ञः । य॒ज्ञं यज॑मानः । यज॑मानं प्र॒जाः । तस्मा॒त्प्रति॑ष्ठितो होत॒व्यः॑ । (८) वा॒जिनौ॑ यज॑ति । अ॒ग्निर्वा॒युः सूर्यः॑ । ते वै वा॒जिनः॑ । ताने॒व तर्प॑यति । अथो॒ खल्वा॑हुः । छन्दाँ॑ सि॒ वै वा॒जिन॒ इति॑ । तान्ये॒व तर्प॑यंति । ऋ॒क्तगा॒मे वा इन्द्र॑स्य॒ हरी॑ सोम॒पानौ॑ ।