वास्तु मण्डन (मण्डन सूत्रधार - गृह, राजप्रासाद, दुर्ग एवं नगर-वास्तु सटीक)

तृतीयोऽध्यायः [दुर्गादिलक्षणम्] बलिनाल्पबलेनापि दुर्गं कार्यं महीभुजा। रक्षणार्थं हि लोकानां तस्मात्पुण्यं महत्तरम्॥ १ ॥ जलदेव¹गृहारामतीर्थदानव्रतादिभिः। यत्पुण्यमाप्नुयाद्राजा दुर्गे दुर्गं करोति यः॥ २ ॥ अन्यवास्तुस्थितं भित्वा कुर्याद्दुर्गं दृढोन्नतम्। तत्राखिलानामाधारोऽन्यथा वित्तायुषोः क्षयः॥ ३॥ सिंहोऽपि सर्वसत्त्वानां बलवान् गिरिगह्वरे। स्थितिं कृत्वा जयत्याशु वैरिवर्गं सुदारुणम्॥ ४॥ गजानां तु सहस्रेण न च लक्षेण वाजिनाम्। यत्कृत्यं साध्यते राज्ञां दुर्गेणैकेन सिध्यति॥ ५ ॥ शतमेकोऽपि संधत्ते प्राकारस्थो धनुर्धरः। तस्माद्दुर्गं प्रशंसन्ति नीतिशास्त्रविचक्षणाः॥ ६॥ शिलादिभिस्तु प्राकारो विशालः प्रोन्नतो दृढः। शुद्धेष्टकाभिः कर्तव्यः परेषां दुर्गमो यथा॥ ७॥ प्राकारे कोष्ठका वृताः विद्याधर्यो युगास्रकाः। तन्मध्ये बाहिका बाह्ये कपिशीर्षैरलङ्कृताः॥ ८ ॥ दशार्कमनुहस्तैश्च विद्याधर्योऽपि कोष्ठकाः। तन्मध्ये बाहिका दैर्घ्ये ²त्रिगुणा कोष्ठतो भवेत्॥ ९॥ १. ग्रहा - In A २. त्रिकोणा - In B, C, D, E