वीरमित्रोदय: राजनीतिप्रकाश (महामहोपाध्याय मित्रमिश्र - प्राचीन भारतीय राजनीति एवं शासन कोष)

कारयेत्तुष्यते येन देवी पशुनिपातनैः ॥ अश्वमेधमवाप्नोति भक्तितः सुरसत्तम । महानवम्यां पूजेयं सर्वकामप्रदायिका ॥ सर्वेषु वत्स वर्णेषु तव भक्त्या प्रकीर्त्तिता । कृत्वाऽऽप्नोति यशो राज्यं पुत्रायुर्धनसम्पदः ॥ इति इति देवीपुराणे महानवम्यां देवीपूजा । अथ चिह्नेषु देवीपूजाविधिः । तत्र देवीपुराणे, ब्रह्मोवाच । क्षीराशी कार्त्तिकारम्भे देव्या भक्तिरतो नरः । शाकयावक एकाशी प्रातःस्नायी शिवारतः ॥ पूजयेत्तिलहोमं तु दधिक्षीरघृतादिभिः । कुर्याद्देव्यास्तु मन्त्रेण शृणु पुण्यफलं हरे ॥ महापातकसंयुक्तो युक्तो वाप्युपपातकैः । मुच्यते नात्र सन्देहो यस्मात्सर्वगता शिवा ॥ अन्यो वा भावनायुक्तस्त्वनेन विधिना शिवाम् । स्वयं वा अन्यतो वापि पूजयेत्पूजयीत वा ॥ न तस्य भवति व्याधिर्न वा शत्रुकृतं भयम् । नोत्पातग्रहदौस्थ्यं वा न च राष्ट्रं विनश्यति ॥ सदा स्वभावसम्पन्ना ऋतवः शुभदा घनाः । निष्पत्तिः सर्वसस्यानां तस्करा न भवन्ति च ॥ प्रभूतपयसो गावो ब्राह्मणाश्च क्रियापराः । स्त्रियः पतिव्रताः सर्वा रूपनिर्वृतिकारिणः ॥ फलपुष्पवती धात्री सस्यानि रसवन्ति च ।