गान्धर्व तन्त्र (शैव-शाक्त आगम - मन्त्र-रहस्य, यन्त्र एवं देवतोपासना सटीक)

अष्टात्रिंशः पटलः । २५७ शक्तिक्षेत्रे शिवक्षेत्रे दीपस्थानं विचिन्तयेत् । वर्त्तुलं रचयेद् देवि कूर्म्माकृति सुलोचने ॥ १८ ॥ तन्मध्ये नव कोष्ठानि कृत्वा वर्णान् समालिखेत् । स्वरान् युग्मक्रमेणैव दिक्षु चाष्टदलेषु च ॥ १९ ॥ अवर्गः कथितो देवि कवर्गादिकसप्तकम् । पूर्वादिक्रमतो देवि कुबेरान्तं लिखेत्ततः ॥ २० ॥ ळक्षवर्णं शंभुकोणे विलिखेत् कूर्मसंज्ञके । यस्मिन् कोष्ठे क्षेत्रनाम तन्मुखं विद्धि पार्वति ॥ २१ ॥ अङ्गेषु पार्श्वयोः पाणियुग्मं जानीहि सुन्दरि । ततः पार्श्वद्वयं देवि कुक्षिस्थानं निगद्यते ॥ २२ ॥ ततः पादद्वयं देवि चान्ते पुच्छं प्रकीर्त्तितम् । मुखे कार्याणि सिध्यन्ति मनोरथशतानि च ॥ २३ ॥ कण्ठस्थाने महेशानि सर्वकार्यविनाशकृत् । उदरे दुःखदारिद्र्यं पादयोर्हानिरुच्यते ॥ २४ ॥ पुच्छे तु धनहानिः स्यादित्येवं कथितं मया । दीपस्थानं समाश्रित्य जपपूजां समाचरेत् ॥ २५ ॥ पूर्वोक्तविधिसंपन्नं गुरुं नत्वा विधानतः । अक्षमालां समाश्रित्य मातृकां वर्णरूपिणीम् ॥ २६ ॥ मन्त्रसिद्धिप्रदां शुद्धां सर्वपापौघनाशिनीम् । प्रणवो मातृका देवी माया चैवामृतत्रयम् ॥ २७ ॥ अमृतत्रयसंयोगाद् दुष्टमन्त्रोऽपि सिध्यति ।