गान्धर्व तन्त्र (शैव-शाक्त आगम - मन्त्र-रहस्य, यन्त्र एवं देवतोपासना सटीक)

अष्टाविंशः पटलः । २५६ यदोन्यत्तु प्रयुञ्जीत मालायां जपकर्मणि ॥ ३८ ॥ मिश्रीभावं तदा याति चण्डालैः पापकर्मभिः । एकजातीयबीजेन यः कुर्यान्मालिकां सदा ॥ ३९ ॥ जन्मान्तरे जायते स वेदवेदाङ्गपारगः । पूर्वोक्तेन विधानेन गृहीत्वा दिव्यमालिकाम् ॥ ४० ॥ जपं समारभेत् पश्चात् प्रोक्तयोगसमन्वितः । तत्र स्थित्वा जपेद्विद्यां लक्षमात्रं सदा शुचिः ॥ ४१ ॥ दधि क्षीरं घृतं गव्यमैक्षवं गुडवर्जितम् । तिलाश्चैव सिता मुद्गाः कन्दः केमुकवर्जितः ॥ ४२ ॥ नारिकेलफलं चैव कदली लव(र्गा?ली)तथा । आम्रमामलकं चैव पनसं च हरीतकी ॥ ४३ ॥ व्रतान्तरप्रशस्तं च हविष्यं मन्यते बुधैः । अवैष्णवमलभ्यं च यदशस्तं व्रतान्तरे ॥ ४४ ॥ त्याज्यमेव तु तत् सर्वं यदीच्छेत् सिद्धिमात्मनः । क्षारं च लवणं मांसं गृञ्जनं कांस्येभोजनम् ॥ ४५ ॥ माषाढकीमसूरांश्च कोद्रवांश्चणकानपि । ताम्बूलं च द्विभक्तं च दुःसंवादं प्रमत्तताम् ॥ ४६ ॥ श्रुतिस्मृतिविरुद्धं च जपं रात्रौ विवर्जयेत् । भूशय्या ब्रह्मचारित्वं मौनं चाप्यननसूयता ॥ ४७ ॥ नित्यं त्रिषवणस्नानं क्षुद्रकर्मविवर्जनम् । नित्यपूजा नित्यदानं देवैतास्तुतिकीर्तनम् ॥ ४८ ॥