गोभिल गृह्यसूत्रम् (सामवेद कौथुम-राणायनीय शाखा - मुकुन्द शर्मा सटीक)

( १३ ) अथ तृतीया कण्डिका — १ प्रागुदीच्यान्दिशि यद्ब्राह्मणकुलमभिरूपम् । २ तत्राग्निरुपसमाहितो भवति ॥ ३ अपरेणाग्निमानडुहं रोहितञ्चर्म्म प्राग्ग्रीवमुत्तरलोमास्तीर्णम्भवति ॥ ४ तस्मिन्नेनां वाग्यतामुपवेशयन्ति ॥ ५ सा खल्वास्त एवानक्षत्रदर्शनात् ॥ ६ प्रोक्ते नक्षत्रे षडाज्याहुतीर्जुहोति 'लेखासन्धिष्व'त्येतत्प्रभृतिभिः॥ ७ आहुतेराहुतेस्तु सम्पातं मूर्धनि वध्वा अवनयेत् ॥ ८ हुत्वोपोत्थायापनिष्क्रम्य ध्रुवन्दर्शयति । ९ "ध्रुवमसि ध्रुवाहम्पतिकुले भूयासममुष्यासावि"ति पतिनाम गृह्णी- यादात्मनश्च । १० अरुन्धतीञ्च ॥ ११ "रुद्धाहमस्मी"त्येवमेव ॥ १२ अथैनामनुमन्त्रयते "ध्रुवाद्यौरि"त्येतयर्चा ॥ १३ अनुमन्त्रिता गुरुं गोत्रेणाभिवादयते ॥ १४ सोऽस्या ( वाग् ) विसर्गः ॥ १५ तावुभौ तत्प्रभृति त्रिरात्रमक्षारलवणाशिनौ ब्रह्मचारिणौ सह शय्यां याताम् ॥ १६ अश्राद्ध्यमित्याहुः ॥ १७ आगतेष्वित्येके ॥ १८ हविष्यमन्नं प्रथमं परिजपितं भुञ्जीत ॥ १९ श्वोभूते वा समशनीयꣳस्थालीपाकं कुर्वीत ॥ २० तस्य देवता अग्निः प्रजापतिर्विश्वेदेवा अनुमतिरिति ॥ २१ उद्धृत्यस्थालीपाकं व्यूह्यैकदेशं पाणिनाऽभिमृशेत् "अन्नपाशेन मणिने"ति ॥ २२ भुक्तोच्छिष्टं वध्वै प्रदाय यथार्थम् ॥ गौर्दक्षिणा ॥ इति द्वि० तृतीया कण्डिका ॥ १ ॥ ३ ॥ ❊ ॥ अथ चतुर्थी कण्डिका— १ यानमारोहन्त्याꣳ "सुकिꣳशुकं शाल्मलिम"त्येतामृचं जपेत् ॥ २ अध्वनि चतुष्पथान्प्रतिमन्त्रयते नदीश्च विषमाणि च महावृक्षान् श्मशानञ्च "मा विदन् परिपन्थिन" इति ॥