मानमेयोदय (नारायण भट्ट - भाट्ट मीमांसा प्रमाण एवं प्रमेय शास्त्र सटीक)

अत एवच मासादेः स्याद्विवक्षानुसारतः । आद्यन्तमध्यमोत्पत्तिकषणप्रभृतिकल्पना ॥ क्षणादिभेदाभावे तु कथं वा स्यादुपाधिभिः । भेदस्तेषां कालमात्रे संबन्धान्निर्विशेषणे ॥ विकारपक्षे कृत्स्नैकदेशयोगविकल्पना । परिहार्या ह्याश्रयैकदेशवृत्तिगुणादिवत् ॥ उपाधिसंबन्धमात्रपक्षेऽपि न विशिष्यते । परिहारोऽयमिति च प्राहुर्लाघवदृष्टयः ॥ स्पन्दसंततिसिद्धयर्थं कालस्याणुत्वकल्पनम् । आशावसनसिद्धान्ते युक्तिचातुर्यजृम्भितम् ॥ क्रियासंततिवत्काले परिणामपरंपरा । किं न स्यात्स्वापकर्षाद्यैः परत्वादिप्रसाधिका ॥ 9 एकाश्रयक्रियासंख्या काल इत्यपरे विदुः । तदुपाधिविशेषाणामुपलक्षणतत्परम् ॥ अव्यक्तं परमाकाशः कालश्चेति त्रिधा स्थिता सैषा प्रकृतिरित्यन्ये ह्येकदेशविदो बुधाः ॥ 10 कालोपाधिविशेषाश्च मञ्जरीप्रकटीकृताः । संगृह्यन्ते सुमनसां स्वान्तविक्षेपशान्तये ॥ चञ्च्वग्रचुम्बिताताम्रचूताङ्कुरकदम्बकैः । कथ्यते कोकिलैरेव मधुः मधुरकूजितैः ॥