मानमेयोदय (नारायण भट्ट - भाट्ट मीमांसा प्रमाण एवं प्रमेय शास्त्र सटीक)

अहं हि सर्वयज्ञानां भोक्ता च प्रभुरेव च । इत्याह भगवान् देवः सर्वदेवमयोऽच्युतः ॥ आत्मनां विभुतासिद्धयै गीताऽधीता कुमारिलैः । अन्यत्र विस्मृता कस्मात् प्रमादो धीमतामपि ॥ तस्मादिन्द्राद्यपायेऽपि न फलस्य च्युतिः क्वचित् । सुप्तिर्मृतिः यस्य न स्तः तस्य चाज्ञा श्रुतिः स्मृतिः ॥ पितृत्वं देवतात्वं च केषां चित्कर्मणां फलम् । तेषां समाराध्यताऽतः द्वारं तत्सर्वशासितुः ॥ बहुधा दृश्यते धर्मः दुर्ज्ञानः सूक्ष्म इत्यपि । महर्षयोऽपि धर्मज्ञाः प्राहुरन्यत्र विस्तरः ॥ (46) कर्मविभागवादः. 1 वेदेन सकलं कर्म काम्यमेवोपदिष्यते । इत्येतत् भर्तृमित्रादेः मतमित्यूहितुं क्षमम् ॥ यतस्ते नोपगच्छन्ति फलं नित्यनिषिद्धयोः । इति कौमारिलाः प्राहुरित्यूचे पार्थसारथिः ॥ निषिद्धस्य फलाभावे न त्याज्यमितिचेन्न तत् । द्विजातिकर्मणो हानिः परत्रासिद्धिरित्यपि ॥ तमेते नरकं प्राहुरिति गौतमसूत्रणम् । नरकं स्यान्त्यक्करणं नीचैर्गमनमेव वा ॥