मानमेयोदय (नारायण भट्ट - भाट्ट मीमांसा प्रमाण एवं प्रमेय शास्त्र सटीक)

वाक्यपद्यामपि विधिविवेके चाभिसूचितम् । हरिणा मण्डनेनापि सर्वसारार्थदृश्वना ॥ तस्मात्सर्वोऽभ्युपगमः प्रतिभामूल इष्यते । न शब्दः प्रतिभाहेतुः स्वातन्त्र्यमुपगच्छति ॥ शास्त्राणां चापि तात्पर्यनिर्णयोऽभ्यासमूलकः । तस्माद्यौक्तिक एवार्थः स्थापितश्शब्दमूर्धनि ॥ शब्दपृष्ठस्थितन्यायसहस्राधिक्रियात्मके । शास्त्रेऽपि न्यायलभ्योऽर्थः शास्त्रसिद्ध इतीष्यते॥ २ अथ शास्त्रेण सिद्धोऽर्थो यदि युक्त्या दृढो भवेत् । एवं स्यात्कृपणश्शब्दः नेष्टोऽसंप्लववादिनाम् ॥ अत्रोदाहरणं स्पष्टमेषोऽप्यर्थो भविष्यति । वेदान्तसिद्धान्ताक्षेपः तत्त्वटीकानिरूपितः ॥ स्वप्रकाशा मतिः धीत्वात् दृश्यत्वादिमतं मृषा । इत्याद्यैरेव सिद्धेऽर्थे कृतं त्रय्यन्तचिन्तया । ननुचोपासनादीनां सिद्धयै तच्चिन्तनं यदि । तच्चेदद्वैतधीसिद्धयै वृथा स्यात्तद्विरोधतः ॥ फलान्तरार्थं तच्चिन्ता यदिष्येत तथासति । मोक्षप्रधानशास्त्रत्वं गतं शारीरकस्य तत् ॥ श्रुतिवाक्यप्रसूता धीर्बाधिका नानुमानिकी । इति शक्यं न वदितुं अदृष्टस्यानपेक्षणात् ॥