निरुक्तम् (महर्षि यास्क मुनि - निघण्टु एवं वैदिक शब्द-व्युत्पत्ति सान्वय सटीक भाष्य)

भ्यः' 'धूः' धूर्वतेर्वधकर्मणः । इयमपि इतरा धूः- एतस्मादेव । विहन्ति वहम् । धारयते वा । कान्तिकर्माणः उत्तरे धातवः अष्टादश । अन्ननामानि उत्तराणि अष्टाविंशतिः । अन्नं कस्मात् ? आनतं भूतेभ्यः । अत्तेर्वा । अतिकर्माणः उत्तरे धातवो दश । बलनामानि उत्तराणि अष्टाविंशतिः । 'बलं' कस्मात् ? बलं भरं भवति । बिभर्त्तेः । धननामानि उत्तराणि अष्टाविंशतिरेव । धनं कस्मात् ? धिनोति-इति सतः । गोनामानि उत्तराणि नव । क्रुध्यतिकर्माणः उत्तरे धातवो दश । क्रोधनामानि उत्तराणि एकादश । गतिकर्माणः उत्तरे धातवो द्वाविंशत्यतम् । क्षिप्रनामानि उत्तराणि षड्विंशतिः । 'क्षिप्रं' कस्मात् ? संक्षिप्तो विकर्षः । अन्तिकनामानि उत्तराणि एकादश । 'अन्तिकं कस्मात् ? आनीतं भवति ।