सात्वत संहिता (पाञ्चरात्र आगम - भगवान् सङ्कर्षण-नारद संवाद सान्वय सटीक)

३८२ सात्वतसंहिता क्रमेण पूर्वपद्मात् तु योजनीयं हि तच्छृणु ॥ २०९ ॥ नाभिसप्तमवर्णं यन्नाभितुर्योपरि स्थितम्। उत्तराधरयोगेन तदेवादाय वै पुनः॥ २१० ॥ अथ नाभितृतीयं तु अधो द्वाभ्यां तु विन्यसेत् । अधःस्थं सप्तमं नाभेस्तच्चतुर्थं तु मूर्धनि ॥ २११ ॥ ततः सप्तममादाय तृतीयं तदधो न्यसेत्। तदधो नेमिवर्णाच्च योजयेदूनविंशकम् ॥ २१२ ॥ भूयो नेमेस्तथादाय नाभिसप्तमपृष्ठगम्। तस्याप्यधस्तृतीयं तु नाभिदेशाच्च विन्यसेत् ॥ २१३ ॥ सर्वेषां नाभिपूर्वं तु पञ्चमार्गसंयुक्तम्। निदध्यादासनं पश्चाच्छिरसा लाञ्छयेत् क्रमात् ॥ २१४ ॥ नवमेन तु वै नेमेररोपान्त्यगतेन तु। नाभीयतुर्यवर्णान्तं प्राग्वन्मध्येऽत्र मन्त्रराट् ॥ २१५ ॥ वौषट्पदद्वयान्तस्थमथ बीजं हि केवलम्। दलान्तरालभूमौ तु चतुष्पत्रस्य योजयेत् ॥ २१६ ॥ अरावसानसंभिन्नं कृत्वा वै नाभिसप्तमम्। तेन युक्तं तथा दद्यादष्टपत्रस्य सन्धिषु ॥ २१७ ॥ तेनैव नाभितुर्यं तु भेदयित्वा तदन्तगम्। कृत्वा बीजवरं कुर्याद् द्विषट्पत्रान्तरालगम् ॥ २१८ ॥ वषट्कारपदोपेतं बीजं शीताम्बुसन्निभम्। न्यसेत् षोडशपत्रस्य सन्धिदेशगतं ततः ॥ २१९ ॥ नाभेः सप्तमबीजं तु तच्चतुर्थासनस्थितम् । अराच्चतुर्दशेनैव तदन्तेनाभिभूषितम् ॥ २२० ॥ एतत्सम्पुटमध्यस्थं क्षरन्तममृतं महत् । पूर्ववद् बाह्यपद्मस्य प्रादक्षिण्येन विन्यसेत् ॥ २२१ ॥ नाभितुर्यमथादाय स्थितं तत्सप्तमोपरि । नेमेर्नवमबीजेन अरान्ताद्येन चाङ्कयेत् ॥ २२२ ॥ बीजमेतन्नियोक्तव्यं संख्याहीनं निरन्तरम्। ऊर्मिभूतं बहिष्ठस्य पयोजावरणस्य च ॥ २२३ ॥ लिख्यैवं सितरक्तेन पीतसूत्रेण वेष्टयेत्। मध्विक्षुरसमाग्राम्बुपूर्णकुम्भे नियोज्य च ॥ २२४ ॥