वीरमित्रोदय: राजनीतिप्रकाश (महामहोपाध्याय मित्रमिश्र - प्राचीन भारतीय राजनीति एवं शासन कोष)

विष्णुधर्मोत्तरोक्तवृक्षायुर्वेदः । २४७ तत्रैव, रङ्गतोयाभिषेचितम् । तद्रङ्गपुष्पं भवति यौवने नात्र संशयः । मत्स्याम्भसा तु सेकेन दृष्टिर्भवति शाखिनाम् ॥ इति । अथैतेषां दोहदानाह— तत्रैव, ततः प्राधान्यतो वक्ष्ये द्रुमाणां दोहदान्यहम् । मत्स्योदकेन शीतेन आम्राणां सेक इष्यते ॥ मृद्वीकानां तथा कार्यस्तेनैव रिपुसूदन । पकासृग्रुधिरं चैव दाडिमानां प्रशस्यते ॥ तुषं देयं च नव्यानां मद्यं च बकुलद्रुमे । विशेषात्कामिनीवक्त्रसंसर्गात्तु गुणो भवेत् ॥ प्रशस्तं चाप्यशोकस्य कामिनीपादताडनम्। शृगालमांसतोयं च नारङ्गाक्षोटयोर्हितम् ॥ मधुपर्ण्युदकं चैव बदराणां प्रशस्यते । गन्धोदकं सगोमांसं केतकानां प्रशस्यते ॥ क्षीरसेकेन भवति सप्तपर्णो मनोहरः । मांसयूषवसामज्जासेकः कुरवके हितः ॥ पूतिमत्स्याघृतं पूतिकार्पासफलमेव च । अरिमेदस्य सेकोऽयं पाटलेषु प्रशस्यते ॥ शृगालमत्स्यमांसाभ्यां चम्पकेषु च वापयेत् । पारावतानां क्षीरेण रुधिरेण च शस्यते ॥ कपित्थबिल्वयोः सेकं गुडतोयेन कारयेत् । जातीनां मल्लिकायाश्च गन्धतोयेन रञ्जनम् ॥ जपाकुरवजातीनां कूर्ममांसं प्रशस्यते ।