वीरमित्रोदय: राजनीतिप्रकाश (महामहोपाध्याय मित्रमिश्र - प्राचीन भारतीय राजनीति एवं शासन कोष)

२४८ वीरमित्रोदयस्य राजनीतिप्रकाशे खर्जूरनारिकेराणां वंशस्य कदलस्य च ॥ लवणेन सतोयेन सेको वृद्धिकरः स्मृतः । विडङ्गलवणोपेतं मत्स्यमांसं भृगूत्तम ॥ सर्वेषामविशेषेण दोहदं परिकल्पयेत् । एवं कृते चारुपलाशपुष्पाः सुगन्धिनो व्याधिविवर्जिताश्च । भवन्ति नित्यं तरवः सुरम्याश्चिरायुषः स्वादुफलान्विताश्च॥इति। इति विष्णुधर्मोत्तरे वृक्षायुर्वेदः । अथ राष्ट्रम् । तत्र मनुः, राष्ट्रस्य सङ्ग्रहे नित्यं विधानमिदमाचरेत् । सुसङ्गृहीतराष्ट्रो हि पार्थिवः सुखमेधते ॥ सङ्ग्रहः, संरक्षणमात्मीयताकरणं वा । द्वयोस्त्रयाणां पञ्चानां मध्ये गुल्ममवस्थितम् । तथा ग्रामशतानां च कुर्याद्राष्ट्रस्य गुप्तये ॥ द्वयोर्ग्रामशतयोस्त्रयाणां पञ्चानां वा ग्रामशतानां मध्ये गुल्मं पदात्यादिसमूहमावस्थितं कुर्यात्स्थापयेत् । राष्ट्रस्य सङ्ग्रहम् इति पाठे सङ्ग्रहं रक्षास्थानं, गुल्मं गुल्मसहितम्, अवस्थितं सत्यशीलपुरुषाधिष्ठितम् । दस्युलाघवगौरवापेक्षयोक्तो विकल्पः। दुर्गे स्थित एकैकस्मिन् ग्रामे ग्रामसमुदाये वा प्रजापालननियु- क्तान् कुर्यात् । तदुक्तम्— विष्णुना,तत्र स्वस्वग्रामाधिपान् कुर्यात् दशाध्यक्षानिति। मनुरपि, ग्रामस्याधिपतिं कुर्याद्दशग्रामाधिपं तथा । विंशतीशं शतेशं च सहस्रपतिमेव च ॥ इति ।