अगस्त्य संहिता (महर्षि अगस्त्य - पञ्चरात्र राम-उपासना एवं मन्त्र-विधान सटीक)

परिशिष्ट 4 (265) एवं सर्वगुणोपेते देशे काले च माधवः। गुण्ये पुण्ये शरण्यः स शरणागतवत्सलः॥१२॥ आविर्भूतो महायोगी द्वितीय इव भाष्करः। रामानन्द इति ख्यातो लोकोद्धरणकारणः॥१३॥ अष्टमेऽब्दे चोपवीतं जातं तस्य तदा ह्यसौ। ब्रह्मचर्यं गृहीत्वा तु विद्याभ्यासं करिष्यति॥१४॥ वर्षे द्वादशे जाते काश्यां गत्वा पुनः स्वयम्। वेदवेदाङ्गशास्त्राणि पुराणानि पठिष्यति॥१५॥ आचार्यलक्षणैर्युक्तं वेदवेदान्तपारगम्। श्रीसम्प्रदायश्रेष्ठञ्च जनोद्धारपरं सदा॥१६॥ विज्ञाय राघवानन्दं लब्ध्वा तस्मात् षडक्षरम्। रहस्यत्रयवाक्यार्थं तात्पर्यार्थं च सन्मतम्॥१७॥ आचार्यलक्षणैर्दिव्यैर्लक्षितो वै भविष्यति। प्रवक्ता सर्वधर्माणामनुष्ठाता च कर्मणाम्॥१८॥ रक्षिता धर्मसेतूनामुपदेष्टा महायशाः। शश्वद्वैष्णवधर्माणां महाकीर्तिरुदारधीः॥१९॥ प्रसन्नवदाम्भोजो विशालाक्षो महाभुजः। कृपालुस्सर्वजीवानामितरेषां च नित्यशः॥२०॥ संसाराम्भोनिधेर्घोरात् समुद्धारपरायणः। वेदवेदान्तनिरतस्सर्वशास्त्रविशारदः ॥२१॥ कामान् पूरयिता नृणां कविः कल्पद्रुमो यथा। गुणवान् दयितः पूज्यः सर्वज्ञो विजितेन्द्रियः॥२२॥ शोभिष्यति धर्मरतैः सद्भिः परिवृतोऽनिशम्। लोके पूर्णकलः खे वै शीतांशुर्भगणैरिव॥२३॥ सुशीलः समदृक् शान्तो दान्तः श्रीमान् जगद्गुरुः। पुनः सत्सम्प्रदायस्य वर्त्तयिता मुनीश्वरः॥२४॥ कृपया यस्य लोकेऽस्मिन् जनाः सर्वे निरामयाः। श्रीरामभक्तिनिरताः सदा धर्मपरायणाः॥२५॥ तादृशस्य महाबुद्धेर्योगिवर्यस्य सत्कवेः। गुणान् कात्स्न्येन संवक्तुं कविः कः क्षमतेऽधुना॥२६॥